Oroscopo ciosoto dela Gina

• Tweet
• Pin It

Ariete (21 marzo - 20 aprile)

Ma che…ma che premura, che fuga del galopìn! Capisso che la canson dixe “L'importante è finire" ma insoma… TI À VOGIA DE CAMBIARE, NO TE INTERESSE EL MODO MA TI À BISOGNO DE UN NOVO CAPITOLO.

Toro (21 aprile - 20 maggio)

Baste ombra, solo luce per ti, no avere paura de mostrare al mondo tute le to capacità e doti. LE TO FADIGHE VA PREMIAE, BASTA MISSIARTE CO L'ORDINARIA AMINISTRASSIÒN!!

Xemei (21 maggio - 20 giugno)

No acantonè el vostro progeto, presto lo ragiungiarè perché se caparbi e tosti. SE NASSE COSSÌ E SE DAVERO NA VELA AL VENTO DRITA E FIERA.

Cancaro (21 giugno - 20 luglio)

Sarà la primavera ale porte, ma se meno indebolii e pi motivai, meno impaurii. I PASSI ORA XÈ SICURI, L'AGENDA XÈ PIENA DE APUNTAMENTI.

Leon (21 luglio - 20 agosto)

Mile robe da fare, mile progeti, mile inissi, mile abandoni, mile ritrovamenti, tra sti impegni ti che xe tì. TOTALMENTE CONCENTRÀ NEL PORTARE A TERMINE E ANDARGHENE FIERO.

Vergine (21 agosto - 20 settembre)

Mola le zavore dela sfiducia e dall'ansia, baste paure, baste noti insoni, se vivi, se umani! PENSA IN MICRO PER MUOVARTE IN MACRO SENSA PÌ PAURE!

Bilansa (21 settembre - 20 ottobre)

Concentreve sula vostra essensa, su quelo che xè pì giusto per voialtri e ve fa vivare ben. BUTA VIA EL SUPERFLUO, PARTI DALA SINCERITÀ VERSO TE STESSO E L'AMORE VERSO DE TI.

Scorpion (21 ottobre - 20 novembre)

Ocio a no deventare na bomba a orologeria che mole le suste nel momento manco oportuno. SCAREGATE CO UN FIÀ DE YOGA E SILENSIO PERCHÉ EL RANCORE E LE URLA NO PORTE A NIENTE.

Sagitario (21 novembre - 20 dicembre)

Riciapa el filo del discorso, vardate al specio e concentrate su quelo che ti vedi sensa metarte pì da parte. SOTO SOTO TI SA COSSA CHE TI VUOI, TE BASTE UN PISSICO DE GRINTA IN PIÙ.

Capricorno (21 dicembre - 20 gennaio)

Fine del nodo ala gola, ripartirè sensa sensi de colpa e pesantesse. Liberi e de corsa in prima fila. CONCRETI E SCATANTI.

Acquario (21 gennaio - 20 febbraio)

Le robe a mexa via no te xè mai piaxeste. Tenive larghi dale incertesse e dai titubanti. AVÈ BISOGNO DE CONCENTRASIÒN E DE CORARE LIBERI.

Pessi (21 febbraio - 20 marzo)

Rinovo e rinascita, luce e concretessa, tra mile nuvoloni se aface la bela stagiòn che per ti devente la pì laboriosa. AMÈ, AMÈ TUTO, SENTÌ TUTO A LIVELI MAGIORI PERCHÉ SE GRANDI MA MONDO SENSIBILI DENTRO.